ЗБОРНЇК РОБОТОХ „STUDIA RUTHENICA” 23 (36) Нови Сад, 2018.
Дружтво за руски язик, литературу и културу (основане 4.12.1970. року у Новим Садзе, ма 1247 членох, од того 1021 порядних, 124 почесних и 102 помагаюцих) видава свой глашнїк од 1975. року. Глашнїк/рочнїк по 1987. рок ношел назву „Творчосц", а од 1988. року виходзи як „Studia Rutnenica". Обявени 13 числа „Творчосци" и 23 числа часопису „Studia Rutnenicа" (вєдно 36 глашнїки). Од трецого числа „Studia Rutnenica" виходзи як зборнїк роботох
У першей часци 23. числа Зборнїку Studia Ruthenica (36. глашнїку) обявени прилоги зоз Округлого стола, хтори у рамикох 27. Дньох Миколи М. Кочиша отримани 1. децембра 2017. року у Новим Садзе, под назву „Културолоґийни процеси у русинистики“. Сход мал два часци: у першей було слова о 140 рокох народзеня о. Дюри Биндаса (1877-1950) о хторим бешедовали Дюра Латяк, Дюрa Биндас, др Юлиян Рамач, Любомир Медєши и Ирина Папуґа. У другей часци о Културолоґийних процесох у русинистики представени вкупно 12 сообщеня хтори пририхтали тото авторе: др Михайло Фейса, мр Славомир Олеяр, мр Канаме Окано, мр Гелена Медєши, мср. Сенка Бенчик, Михаїл Римар, Олена Планчак Сакач, Гавриїл Колєсар, Єлена Перкович, Соня Виславски, Миломир Шайтош и Леона Лабош Гайдук.
У другей часци, под назву Предшколске воспитанє и образованє було слова о
Сликовнїцох за предшколски дзеци, хтори бешедовали Ирина Папуґа и Дюра Латяк на схадзки Активу вихователкох 2. септембра 2017. Руски Керестур.
У трецей часци ше находза прилоги о новиших виданьох и то о словнїкох (2), о других виданох (3) и о виданох Дружтва (19). О Словнїку руского народного язика писал др Юлиян Рамач, а о Русско-русинский словарь Блаженка Хома Цветкович и Григорий Миронов. О других виданьох писали: Юлиян Пап, мр Гелена Медєши и Мария Тот, а о виданьох Дружтва: др Оксана Тимко Дїтко, мр Гелена Медєши, Блаженка Хома Цветкович, Дюра Лїкар, Любомир Медєши, Люпка Варґа Цвеїч, Ирина Папуґа, Александра Колбас, Серафина Макаї, Оля Балїнт, Оленка Русковски, мср. Сенка Бенчик, Серафина Яґлица, Марина Сабадош, Мария Стрибер и мср Ана-Мария Рац.
У штвартей часци призначени здогадованя на Ксению Саламон, Дюру Лїкара, Михайла Зазуляка, Любку Сеґеди Фалц и Славка Загорянского.
У пиятей часци Рочнїци и юливелї находза ше написи о: проф. Янкови Ердельови, Юлиянови Д. М. Колєсарови и о Гелени Гафич Стойков.
У шестей часци Награди и припознаня призначене же мср. Оля Яковлєв, добитнїк 10. ювилейного припознаня „Проф. Гавриїл Г. Надь“, а Владимир Салонски, Митровданскей повелї Општини Жабель.
Седма часц Хронїка Дружтва облапя написи/школски роботи школярох штреднїх школох у Новим Садзе: Желько Сопка, Иван Чижмар и Давид Шанта о руским зику. Тиж дати и препатрунок активносцох Дружтва за руски язик, литературу и културу зоз 2017. року, список членох Дружтва за руски язик, литературу и културу и хто зоз уплату членарини помогол видаванє „Studia Rutnenicа" 23, а тиж и список 20 авторох прилогох у часопису.
Зборнїк роботох „Studia Rutnenica" ма Редакцию у составе др Юлиян Рамач, главни редактор и члени др Александер Д. Дуличенко, мр Гелена Медєши, мр Ксения Сеґеди, др Оксана Тимко Дїтко, мср. Сенка Бенчик и др Михайло Фейса. Тексти у „Studia Rutnenici" ше обявюю на руским язику зоз резимеама по сербски и анґлийски. Прекадатель резимеоа на анґлийски язик мр Славомир Олеяр и София Николаєвич.
*
Studia Ruthenica ше од 22. октобра 2018. року находзи на википедиї и єдини є наукови часопис по руски хтори у Репозиториюме Народней библиотеки Сербиї у Беоґрадзе (ма катеоризацию (М53). Видаванє „Studia Rutnenici“ 23 за 2018. рок финансийно потримали: Покраїнски секретарият за културу, явне информованє и сотруднїцтво з вирскима заєднїцами и Городска управa за културу Нового Саду, зоз потримовку, Покраїнского секретарияту за образованє, предписаня, управу и национални меншини-национални заєднїци и Националного совиту Руснацох на чим им на тот завод щиро дзекуєме.
Ирина Папуґа, Нови Сад, 15. 01. 2019. року
